HUSSAIN AUR BHARAT Viswanath Prasad Saheb Mathur* Luckhnawi Moharram, 1383 Hijri


HUSSAIN AUR BHARAT Viswanath Prasad Saheb Mathur* Luckhnawi Moharram, 1383 Hijri

Aankh meiN unki jagah, dil meiN makaaN Shabbir ka
Yeh  zameeN  Shabbir ki,  yeh  aasmaaN  Shabbir ka
Jab  se  aaney  ko  kaha  tha,  Karbala se Hind meiN
Ho   gaya   uss   rozz   se,   HindostaaN  Shabbir ka

Mathur* Luckhnawi

Pesh Lafz

Agar chey iss mauzuu ya unwaan ke maatahat mutaaddid mazaamin, darjanoN nazmeiN,aur beshumaar risaley shayaa ho chuke haiN, lekin yeh mauzuu apni ahmiyat ke lehaaz se merey naachiz khayal meiN abhi tashnae fikr o nazar hai. Iss liye iss risaley ka unwaan bhi maiN ne ” HUSSAIN AUR BHARAT ” rakha hai aur mujhey yaqeen hai ke naazeriin isey zaroor pasand farmaeiN ge.

Naachiiz,
MATHUR LUCKHNAWI

Iraq aur Bharat ka zaahiri faasla to hazaaroN km. ka Hai. Agar chey iss faasley ko maujooda zamaaney ki teiz raftaar sawariyoN ne bahot kuch aasaan kar diya hai, lekin safar ki yeh sahulateiN aaj se 1322 baras pahle maujood na thiiN.

Moharram 61 H. meiN Hazrat Mohammed Saheb ke Chotey nawaasey Hazrat Imam Hussain ne Bharat ki Sarzameen Par aane ka iraada farmaya tha, aur unhoN ne apne dushman Yazid ki tiddi dal fauj ke siphe saalaar Omar Ibne Saad se apni chand shartoN ke namanzoor honey ke baad yeh kaha tha Ke agar meri kisi aur shart par raazi nahiN hai to mujhe choRh De taaki main Bharat chala jaauN.

MaiN aksar yeh ghaur karta rehta hooN ke terah sau saal pahle jo safar ki dushwaariyaN ho sakti theeN, unko peshe nazar rakhtey huey Hazrat Imam Hussain ka Bharat ki sarzameen ki janib aane ka qasd karna, aur yeh Jantey huey ke na to uss waqt tak fatahe Sindh, Mohd. Bin Qasim paida hua tha, aur na hum hinduoN ke mandiroN ko mismaar karne wala Mahmood Ghaznavi hi aalame wujood meiN aaya tha. Na uss waqt Bharat meiN koi masjid bani thi aur na Azaan ki aawaaz buland huii thi, balkey ek bhi musalmaan tijarat ya san’at o hirfat ki buniyaad par bhi yahaaN na aa saka tha, na maujood tha. Uss waqt to Bharat meiN sirf chand hi qaumeiN aabaad thin, jo buniyaadi taur sey Hindu mazhab sey hi mutaalliq ho sakti haiN. Magar inn tamaam haalaat ka andaaza karney ke baad bhi ke Bharat meiN koi musalmaan maujood nahiN hai, Hazrat Imam Hussain ne Umar e Saad se kyoN yeh farmaaya ke Mujhey Bharat chala jaane dey.

Agarchey hazrat  Imaam Hussain ki shahaadat se pahley Kisi na kisi tarah sarzameene Iran tak Islam pahoNch chukka tha,  aur sirf Iran hi par munhasir nahiN hai, balke Habash ko choRhkar jahaN Hazrat Ali ke chotey bhai Jafar e Tayyaar Quran aur Islam ka paigham lekar gaey they, deegar mulk bhi Iran ki tarah jung o jadal ke baad uswaqt ki Islami sultanate Ke maatahat aa chukey thEy, jaise ke Misr wa Shaam waghairah, Isliye Hazrat Imam Hussain ke liye Bharat ke safar ki dushwariyaaN Saamney rakhte huey yeh ziyaada aasaan tha ke who Iran chale jaate, ya Misr o Shaam jaane ka irada kartey, magar unhoNne aisii kisi tamanna ka izhaar nahiN kiya, sirf Bharat ka naam hi unki pyaasi zubaan par aaya.

Khususiyat se Habash jaane ki tamanna karma Hazrat Imam Hussain ke liye zyada aasaan tha, kyuNki na sirf baadshahe Habash aur uske darbaari Islam qubool kar chuke they balki Hazrat Imam ussain ke haqeeqi chacha Hazrat Jafar ke Ikhlaaq wa mohabbat se Baadshahe Habash zyada muta’ssir Bhi ho chukka tha. YahaaN tak ke usney khudd Hazrat Jafar ke Zariye se bhi aur unke baad mukhtalif zaraaey se Rasoole Islam Aur Hazrat Ali ki khidmat meiN bahut kuch tohfey bhi rawana Kiye they, balke waaqeaat yeh batatey haiN ke khat o kitabat Bhi baadshahe Habash se hoti rahti thi. Doosra sabab Habash jaane ki tamanna ka yeh bhi ho sakta tha ke uswaqt jitnii diqqateiN Habash ka safar karne ke silsiley meiN Imam Hussain ko pesh aateeN, who issey bahot kam hoteeN jo Hindostan ke safar ke silsiley meiN khayal ki ja sakti theeN. Magar Habash ki sahulatoN ko nazar andaz karne ke baad Hazrat Imam Hussain kisi bhi naumuslim mulk jaane ka iraada nahiN kartey, balke uss Hindostan ki jaanib unka noorani dil khinchta hua nazar aata hai, jahaN uswaqt eik bhi Musalman na tha. Aakhir kyoN?  Yehi who sawaal hai jo baar baar merey damagh ke rauzanoN meiN aqeedat ki raushni ko teizh karta hai, aur apni jagah par main iss faisley par atal ho jaata hooN ke jis tarah se Hindostan waaloN ko Hazrat Imam Hussain se mohabbat honey waali thi usi tarah Imam Hussain Ke dil meiN hum logon ki mohabbat maujood thi.

Mohabbat who fitri jazba hai jo dil meiN kisi ki sifarish ke baghair Khud ba khud paida hota hai, aur kam az kam main uss mazhab ka Qaael nahiN ho sakta, ya uss mohabbat par imaan nahiN la sakta Jiska ta’aluq jabri ho. Duniya meiN saikRhoN hi mazaheb haiN, Aur har mazhab ka reformer yeh daawa karta hai ke usi ka mazhab haq hai, aur yeh faisla qayamat se pahle duniya ki nigahoN ke saamne aana mumkin nahiN hai, ke kaun sa mazhab haq hai. Lekin chahey chandd mazhab haq hoN, ya eik mazhab haq ho, Hum ko isse gharaz nahiN hai, hum to sirf mohabbat hi ko haq Jaante haiN,aur shayed isi liye duniya ke baRhe baRhe PaighambaroN aur RishiyoN ne mohabbat hi ki taaleem di hai.

Mohabbat ka meiyaar bhi har dil meiN yaksaaN nahiN hota, Mohabbat eik haiwaan ko doosre haiwaan se bhi hoti hai, aur insanoN meiN bhi mohabbatoN key aqsaam ka koi shumaar nahiN hai, maaN ko betey se aur betey ko maaN se mohabbat hoti hai, bahan ko bhai se aur bhai ko bahan se mohabbat hoti hai, chacha ko bhateejey se aur bhateejey ko chacha se, baap ko betey se aur betey ko baap se mohabbat hoti hai. Inn tamaam mohabbatoN ka silsila  nasbi rishtoN se munsalik hota hai. Lekin aisii bhi mohabbateiN duniya meiN maujood haiN, jo shaohar ko zauja se aur zauja ko shaohar se hoti hai, ya eik dost ko doosre dost se hoti hai, inn sab mohabbatoN ka inhesaar sabab ya asbaab par hota hai. Magar who mohabbateiN inn tamaam  mohabbatoN se buland hoti haiN, jo insaniyat ke buland tabqey meiN paai jaati haiN, masalan Paighamber Nooh ko apni kashti se mohabbat, ya Hazrat Ibrahim ko apne betey Ismail se mohabbat, ya Hazrat Mohammed  ko apni ummat se mohabbat, Yeh tamam mohabbateiN uss meiyaar se bahot ooNchi hoti haiN, jo Aam sateh ke insanoN meiN paai jaati haiN. Lehaaza yeh maanna paRhega ke Hazrat Imam HussaiN ke dil meiN Hindostan aur uske rahney waaloN ki jo mohabbat thii, who usii buland meiyar se ta’aluq rakhti hai jo Paighambare Islam Hazrat Mohammed Saheb ko apni ummat se ho sakti ho, kyoNke agar yeh mohabbat aala meiyaar ki na hoti to uska wajood waqti hota, ya uss ahad se shuroo hoti, jab se Islam Hindostan meiN aaya, ya doosre alfaaz meiN musalmaan yahaN aabaad huey. Magar nahiN, jab hum ghaur kartey haiN to yeh maalum hota hai ke Hazrat Imam Hussain ki mohabbat ka laamutnaahi silsila 1322 baras pahley se Roze Aashoor shroo hota hai, aur yeh silsila uswaqt tak baaqi rahney ka yaqeen hai jab tak duniya aur khud Hindostan ka wajood hai.

Ye baat bhi insaan ki fitrat taslim kar chuki hai ke roohani peshwa Jitney bhi hotey haiN unmeiN se aksar ko na sirf guzre huey waaqeat Ka ilm hota hai, balkey aaenda pesh aaney waley haalaat bhi unki nigahoN ke saamney rahte haiN. Hazrat Imam Hussain ka bhi aisi hi buland hastiyoN meiN shumar hai, jinko aaenda zamaney ke waaqeaat wa haalaat ka mukammal taur se ilm tha, aur isi bina par who jaante they ke unke chahney waley Hindostan meiN zaroor paida hoNge. Jaisa ke unka khayal tha , who hokar raha, aur yahaN Islam ke aane se pahle Himalya ki sarbuland chotiyoN par “ HUSSAIN POTHI “ paRhi jaane lagi. Zahir hai ke jab musalman sarzamin e Bharat par aaey nahin they, uss Waqt Hussain ki Pothi paRhney waley siwaaey HinduoN ke aur kaun ho sakta hai. Ho sakta hai ke usee waqt se sarzameene Bharat par HUSSAINI BRAHMAN nazar aane lage hoN, jinka silsila ab tak jaari hai, balkey yeh Tamam Brahman mazhaban Hindu mazhab ke maanne waale hote haiN sadyooN se , lekin mohabbat ke usool par who Hussain ki taalim ko bahot ahmiyat dete haiN.  YuuN to Hussaini Brahman poore mulk meiN dikhaee dete haiN, magar khususiyat se Jammu aur Kashmir ke elaqey meiN inlogoN ki kaseer aabadi hai, jo hamawaqt Hussaini taaleem par amal paira hona sabab e fakhr jaante haiN. Lehaaza yeh tasleem karma paRhega ke Hazrat Imam Hussain ko Hindostan aur uske rahne waalon se jo mohabbat thi, who Na sirf haqeeqat par mubni kahi ja sakti hai, balke unki mohabbat ke asaraat Unki Shahadat ke kuch hi arsey baad se diloN meiN nushuonuma paane Lagey. Hum nahiN kah sakte ke Imam Hussain ki mohabbat ko aur unke Gham ko Hindostan meiN lane wala kaun tha, jabke (yahaN) musalmaanoN Ka uswaqt wajood hi nahiN tha, lehaaza yeh bhi manna paRhega ke Imam Hussain ke gham ko ya unki mohabbat ko sarzameene HindostaN par pahuNchane waali wohi ghaibi taaqat thi, jisne unke gham mein aasmanoN ko khoon ke aaNsuoN se ashkbaar kiya, aur fazaaoN se Ya Hussain ki sadaaoN ko buland karaya.

Aur ab to Hussain ki azamat, unki shakhseeyat aur unki bepanaah Mohabbat ka kya kehna. Har shakhs apney damaagh se samajh raha hai, Apne dil se jaan raha hai, aur apni aankhon se dekh raha hai, ke sirf Musalmaan hi Moharram meiN unka gham nahiN manatey, balke Hindu Bhi ghame Hussain meiN azaadar hokar iska sabot detey haiN ke agar Imam Hussain ne Aashoor ke din Hindostan aane ka iraada zahir kiya tha, To hum HinduoN ke dil meiN bhi unki mohabbat ke jawaabi asaraat numaayaN hokar rahte haiN.

Moharram ka chaand dekhte hi, na sirf ghareeboN ke dil aur aankheN Gham e Hussain se chalak uthtee haiN, balke HinduoN ki baRhi baRhi shakhsiyateiN bhi bargaahe Hussaini meiN khiraaj e aqeedat pesh kiye baghair nahin rahtiN. Ab to khair Hindostaan meiN khud mukhtaar riyasatoN ka wajood hi nahiN raha, lekin bees baras qabl tak, Gwalior ki azadaari aur Maharajah Gwalior ki Imam Hussain se aqeedat imteyaazi haisiyat rakhti thi. Agar chey Moharram ab bhi Gwalior mein shan o shaukat ke saath manaya jaata hai, aur sirf Gwalior hi par munhaser nahin hai Indore ka Moharram aur wahan ka ooNcha aur wazni taaziah duniya ke goshey goshey meiN shohrat rakhta hai. Hyderabad aur junoobi Hindostan meiN Aashoor ki raat ko Hussain ke aqeedatmand aag par chal kar mohabbat ka izhaar kartey hai, wahaN ab bhi eik Maharaj haiN jo sabz libas pahan kar, aur Alam haath meiN lekar jab tak dahekte huey angaaroN par doolha doolha kahte huey qadam nahiN baRhate, tab tak koi Musalman Azadaar aag par paaoN nahiN rakh sakta. Yeh kya baat hai hum nahiN jaante, aur Hussain ke muta’aliq bahut si baateiN Aisi haiN jisko chahe aql na bhi tasleem karti ho, magar nigaaheiN barabar Deikhti rahti haiN, yaani agar Hazrat Imaam Hussain ke gham ya unki azadaari meiN ghaibi taaqat na shamil hoti to who karamateiN duniya na dekh sakti jo har saal Moharram meiN deikhti rahti hai. Agar aaj cigarette sulgaane meiN diyasalaai ka charka ungli meiN lag jaata hai to chaala paRhey baghair nahiN rahta, iss liye ke aag ka kaam jala dena hi hota hai, magar dahektey huey angaaroN par Hussain ka naam lene ke baad raasta chalna aur paaoN ka na jalna, ya chaaley na paRhna, Hussain ki karamat nahiN to aur kya hai?

Isse inkaar nahiN kiya ja sakta ke hamarey Bharat meiN Iraq se kam Azadari nahiN hoti, yeh sab kuch kya hai? Usi Hussain ki mohabbat ka Karishma aur asaraat haiN, jisney apni shahadat ke din Hindostan aane ka Iraada zaahir kiya tha.

Duniya ke har mazhab meiN muqtadir shakhsiyateiN guzri haiN, aur kisi Mazhab ka daaman aisi buland o baala hastiyoN se khali nahiN hai jinki azmat Bahar taur maanna hi paRhti hai, jaise ke IsaaiyoN ke Hazrat Issa, ya YahudioN ke Hazrat Moosa. Magar jitney mazaaheb ki jitni bhi qaabile azmat hastiyaaN Hoti haiN, unko sirf usii mazhab waaley apna peshwa maante haiN, jis mazhab meiN who hoti haiN. Agar chey ehtaraam har mazhab ke RishiyoN, PeshwaoN, PaighambaroN ka har shakhs karta hai, aur karma hii chahiye, lekin iss haqeeqat Se chahey Hazrat Imam HussaiN ke dushman chashm poshi kar leiN, magar hum logg yeh kahe baghair nahiN rah sakte ke Hazrat Imam Hussain ki bainulaqwaami haisiyat aur unki zaat se, baghair imtiyaaze mazhabo millat har shakhs ko itni itni gahri mohabbat hai, jitni ke kisi ko kisi se nahiN hai. Aisa kyuN hai, hum nahiN kah sakte, kyuNke bahut sii baateiN aisi bhi hoti haiN jo zabaan tak nahiN aa sakti haiN, magar dil unko zaroor mahsoos kar leta hai.

Aap duniya ki kisi bhi paRhi likhi shakhsiyat se agar Imam HussaiN ke muta’aleq daryaaft kareiNge to who iss baat ka iqraar kiye baghair nahiN rah sakega ke yaqeenan Hussain apne nazaryaat meiN tanha haiN, aur unki azmat ko tasleem karne waali duniya ki har Qaum, aur duniya ka har Mazhab, aur uske taaleem yaafta afraad haiN.

Eik baat meri samajh meiN aur bhi aati hai, aur who yeh ke Hindostan chuNke mukhtalif mazaaheb ke maanney waaloN ka markaz hai, aur Imam Hussain ki shakhsiyat meiN aisa jazb paaya jaata hai, ke har qaum unko khiraaje aqeedat pesh karna apna farz jaanti hai, aur yeh main pahle hi arz kar chukka hooN ke Hazrat Imam Hussain chuNke aaney waale waaqea’at ka ilm rakhte thEy, isliye who zaroor jaante hoNge ke eik zamaana who aane waala hai ke jab Bharat ki sarzameen par duniya ke tamaam mazaheb ke maanne waale aabaad hoNge. Isliye Hussain chahtey thEy ke duniya ki har qaum ke afraad yeh samajh leiN ke unki musibateiN aur pareshaniyaN aisi theeN jinsey har insaan ko fitri lagaao paida ho sakta hai, khwah uska ta’alluq kisi mazhab se kyuN na ho. Isi tarah Yazid ke zulm o jaur aur uske badnaam character ko bhi uske bepanaah mazaalim ki maujoodgi meiN samjha ja sakta hai. Chunanchey haqeeqat to wohi hoti hai jisko duniya ka har who shakhs tasleem kare jiska ta’alluq khwaah kisi mazhab se ho. Lehaaza Hindostan meiN chuNke har qaum o mazhab ke insaaf pasand hazraat ki kami nahiN hai, isliye ho sakta hai ke Hazrat Imam Hussain ne isi maqsad ko pesh e nazar rakhte huey yeh irshad farmaya ho ke who Hindostan jaane ka irada rakhte haiN. Agar chey unki tamanna poori na ho saki, lekin masheeyat ka yeh maqsad zaroor poora ho gaya ke Hindostan ki sarzameen par rahne waale baghaire imtiyaaze mazhab, Imam Hussain ko mohabbat o aqeedat ke moti nichawar kartey rahtey haiN aur kartey raheiNgey.

By MIRZA JAMAL

Advertisements

3 thoughts on “HUSSAIN AUR BHARAT Viswanath Prasad Saheb Mathur* Luckhnawi Moharram, 1383 Hijri”

  1. salam-o-alaikum,

    god bless u all…4 distributing godd messageses…
    arz hai isi issue se related..
    shabbir ne kaha tha jane do hind mujhe
    shai ki zanab pe tha nam-o-nishan hamara
    shayad isiliye iqbal ne kaha tha
    sare jahan se achchha hindustan hamara

    do;t mind…nothing cooments….

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s