MIRZA GHALIB – QASEEDAH / Sharah – Ghulam Rasool Meher


MIRZA GHALIB – QASEEDAH / Sharah – Ghulam Rasool Meher

SALAM USEY KE AGAR BAADSHAH KAHEn USKO
TO PHIR KAHEn KE KUCH ISSE SAWA KAHEn USKO

(us muqaddas wajood ko salam jise baadshah kaheiN to khud
hi khayal aata hai ke kuch isse sawa kahna chahiyeh)

NA BAADSHAH, NA SULTAAn YEH KYA SATAESH HAI
KAHO KE KHAMISE AALE ABA KAHEIn USKO

(aale aba, woh buzurg hastiyaaN jinheiN aam rawayet ke
mutabiq rasulullah ne apni abaae mubarak meiN lekar
aayae tatheer parhi, yani unheiN gunahoN se bilkul paak
qarar diya, muraad hai hazrat fatima, hazrat ali, hazrat hassan,
hazrat husain.kyuNke iss muqaddas jamaat ki ginti meiN
rasulullah sabse pahle aate haiN iss liye imam husain ko
khamise aale aba kahte haiN. yaaneiN aale aba meiN
paanchweiN.
na woh baadshah haiN, na woh sultan haiN,unheiN aise
alqaab se yaad karna satayesh ka kaun sa tariqa hai ?
yeh kahna chahiye ke woh aale aba meiN se paanchwein
buzurg haiN.)

KHUDA KI RAAH MEIn SHAAHI WA KHUSRAWI KAISI
KAHO KE RAHBARE RAAHE KHUDA KAHEn USKO

(bhala allah taala ke raaste neiN badshahi wa khusrawi ki kya
haqeeqat hai ke hazrat imam husain ke liye yeh laqab jaayez
samjhe jayeiN ? yuuN kehna chahiye ke aap raahe khuda ke
rahbar haiN jin ki pairavi meiN log yeh raasta taey kartwe haiN)

KHUDA KA BANDA, KHUDAWANDGAR BANDOn KA
AGAR KAHEIn NA KHUDAWAND KYA KAHEIn USKO

(woh khuda ke bande haiN aur bandegaane khuda ke aaqa haiN.
phir agar unheiN khudawand na kaheiN to kya kaheiN.)

FAROGHE JAUHARE EIMAAn, HUSSAIN IBNE ALI
KE SHAMME ANJUMANE KIBRIYA KAHEn USKO

(husain ibne ali jauhare iman ki jila haiN.yaani khasaane khuda
ki jo anjuman hai usmeiN imam husain ko shama ki haisiyat
haasil hai)

KAFEELE BAKHSHISHE UMMAT HAI BAN NAHEIn PARTI
AGAR NA SHAAFAEY ROZEY JAZA KAHEIn USKO

(unhuney bakhshishey ummat ki zimmedari utha li hai.
lehaza yehi kahna chahiye ke unhein qayamat ke din
shafaat karne wala qarar diya.)

MASEEH JIS SE KAREY AKHZE FAIZE JAAn BAKHSHI
SITAM HAI KUSHTAEY TEGHE JAFA KAHEIn USKO

(jis se masih bhi jaN bakhshi ka faiz hasil kare, ghazab hai
ke usey zulm ki talwar ka kushta kaha jaaye.matlab yeh ke
aise baland manzalat wujuud ne zulm ki talwar se khilate
shahadat paaya. shahid hone ke aitebar se woh zinda javed
haiN, unheiN ‘kushta’ nahiN kaha ja sakta)

WOH JIS KE MAATAMIUn PAR HAI SALSABEELE SABEEL
SHAHEEDE TASHNALABEY KARBALA KAHEIn USKO

(woh paak zaat jiske matamiuN ke liye sabeel, salsabeel
[behisht ki ek nahar] ki haisiyat rakhti hai,ya salsabeel sabeel
bani huee hai. use karbala meiN tashnalab qaraar dena parta hai)

ADU KE SAMEY REZA MEIn JAGAH NA PAAEY WOH BAAT
KE JINNO INSO MALAK SUB BAJAA KAHEIn USKO

(dekho kitna ghazab hai ke jis baat ko jin, insan aur farishtey sab
durust kahte haiN, woh dushman ke kaan meiN jagah na pa saki.
dushman ke kaan use sun na sake.)

BAHUT HAI PAAYAE GARDE RAHE HUSAIN BULAND
BAQADRE FAHEM HAI GAR KEEMYA KAHEIn USKO

(imam husain ke raaste ki gard ka paaya bahut baland hai,
agar hum usey kimya kaheiN to yeh hamarey fahm ka eik
andaaza hai, asl haqeeqat isse bahut arfao aala hai.)

NAZARA SOUZ HAI YAAn TAK HAR EIK ZARRAEY KHAAK
KE EIK JAUHARE TEGHE QAZAA KAHEIn USKO

(karbala ki khak ka zarra zarra iss darja binaai ko jila dene
wala hai ke usey qaza ka jouhar kehna chahiye.jis tarah
talwar ke jauharoN ki durakhshani nigahoN meiN khairgi
paida kar deti hai, wohi kaifiat karbala ki khaak ke ek ek
zarrey ki hai, phir kyiN na har zarrey ko qaza ka jouhar kaheiN)

HAMAREY DARD KI YARAB KAHIn DAWA NA MILEY
AGAR NA DARD KI APNE DAWA KAHEIn USKO

agar hum iss khak ko apne dard ki dawa na kaheiN to khuda
kare hamarey dard ki dawa kahiN na mile)

HAMARA MUnH HAI KE DEIn USKE HUSNE SABR KI DAAD
MAGAR NABI WA ALI MARHABA KAHEIn USKO

(imam husain ne sabr ki jo shan dikhaee hamara kya muNh hai
ke uski daad de sakeiN. yaani hum kyuNkar iska sahee andaaza
kar sakte haiN.albatta rasul aur hazrat ali ispar marhaba kaheiN
to bilkul munasib hai.)

ZAMAME NAAQA KAF USKEY MEIn HAI KE HAAEY GHAZAB
PAS AZ HUSAINE ALI PESHWA KAHEIn USKO

(ab oontni ki mehar us buzurg ke daste mubarak meiN hai jise
ahle iman imam husain ke baad peshwa kaheiN.isse muraad haiN
imam zainal aabedin)

WOH REIGE TUFHTAEY WAADI PA GAAM FARSAA HAI
KE TAALIBAANE KHUDA RAHNUMA KAHEIn USKO

(woh waadi ki tapti reit par chal rahey theiy, jinhein raahe khuda ke
taliboN ke liye zeba tha ke apna rahnuma qarar deiN.)

IMAAME WAQT KI YEH QADR HAI KE AHLE ENAAD
PIYAADA LECHALEIn AUR NASAZAA KAHEIn USKO

(jin buzurg ko imame waqt hone ka sharaf haasil tha,
kya yeh uski qadro manzilat hai ke dushmani rakhne waale loge
unheiN piyada saath lekar chaleiN aur unke liye namunasib
baateN zaban par laaeiN.)

YEH EJTEHAAD AJAB HAI KE EK DUSHMANE DEEn
ALI SE AAKE LARE AUR KHATA KAHEIn USKO

( yeh ajeeb ijtehad hai ke ek shaqs deen ka dushman hokar
hazrat ali se jang karey aur kaha jaae ke yeh ek ijtehadi
khata thi. – yeh ishara ameere muawiah ki taraf hai)

YAZID KO TO NA THA IJTEHAAD KA PAAYA
BURA NA MAANIYE GAR HUM BURA KAHEIn USKO

(yazid ko to ijtehad ka moqam hasil na tha, woh to mujtahid
na tha. agar usey bura kahein to bura na maniye)

ALI KE BAAD HASSAN, AUR HASSAN KE BAAD HUSAIN
KAREY JO INSE BURAAI BHALA KAHEIn USKO ?

( hazrat ali ke baad imam hasan aur unke baad imam hussain
imam wa peshwa hain, jo in teenoN se buraee karey usey
bhalaa kyuNkar kaheiN.)

NABI KA HO NA JISEY AITEQAAD KAAFIR HAI
RAKHE IMAM SE JO BUGHZ KYA KAHEIn USKO

( jo shaqs rasul par imaan na laaye wo kaafir hai, jo imam
se dushmani rakhey, usey kya kaheiN?)

BHARA HAI GHALIBE DIL KHASTA KE KALAM MEIn DARD
GHALAT NAHEIn HAI KE KHOONEEn NAWA KAHEIn USKO

( ghalib ka dil zakhmi hai, uske kalam meiN dard bhara hua hai,
agar kaheiN ke uski zaban par lahu bharey taraney jaree haiN
to yeh ghalt nahiN.)

MIRZA JAMAL

Advertisements

One thought on “MIRZA GHALIB – QASEEDAH / Sharah – Ghulam Rasool Meher”

  1. MUHTERMI !

    As SALAMALAIKUM MUJHAY BOHUT KOSHISH AOR KAWISH K BAAd MUJHAY GHLIBSAHIB KA YAY SALAAM MA TERJUMA AOR TASHREEH K YAY SALAAM ( SALAAM USAY K AGER BADAYSHA KAHEN USKO ) JISAY MUJHAY BADI MUDDAT SAY TALAASH THI WO MUJHAY AAPKE ISS WEB SITE PER AAJ MILL GAYA ALLAH AAPKO ISS MAHNAT AOR ISS KARNAMAY AJER WO SAWAB ATA FERMAY AAP NAY MERI MUSHKIL KO BAGAIR AASAN KR DEYA ALLAH AAPKO AASANEYAN FERMAY AAMEEN , MUJHAY HAIRAT ISS BAAT KE HY MEN YAY SALAAM GHALISAHIB KAY KALAAM AOR MUQTALEF DEVON AOR DOSERE GHALIBSAHIB KE SHARHON MEN BAWOJOD TALASH K YAY.SALAM MUJHAY TAHREERI SHKAL MEN AB TUK NA MIL SAKA AOR NA YAY UNKAY KALAM MEN NAZER AAYA AISA KYON AOR ISKE WAJH? MAHERBANI HOGE AGER AAP ISS BARAY MEN MALOMAT SAY NAWAZEN SHOKEREYA ! AAPKA DOST

    MOHAMMED MOIZUDDIN
    10/9/09 FRI

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s